Makarani waongozaji wapigaji kura wa uchaguzi mdogo wapatiwa mafunzo na Tume ya Taifa ya Uchaguzi (NEC)

Posted on: December 13th, 2022

Leo tarehe 13-12-2022 katika ukumbi wa Halmashauri ya mji Handeni zaidi ya makarani 12 wa uchaguzi mdogo wa udiwani wa Kata ya Vibaoni, Halmashauri ya Mji Handeni wamepatiwa mafunzo na maafisa wa Tume ya Taifa ya uchaguzi sambamba na kula kiapo mbele ya Hakimu Mkazi wa mahakama ya Wilaya ya Handeni Mh.Joakim Joram Mwakyolo

Hakimu mkazi wa mahakama ya wilaya ya Handeni Mh.Joakim Joram Mwakyolo akithibitisha fomu za viapo vya makarani wa uchaguzi mara baada ya kula kiapo.

Akizungumza na Makarani waongozaji hao katika ufunguzi wa mafunzo hayo mara baada ya kula kiapo, Msimamizi Msaidizi Uchaguzi wa jimbo la Handeni Mjini Ndugu. Steven C. Bavu amewaasa Makarani waongozaji wapiga kura hao kuzingatia lugha nzuri, busara na hekima katika muda wote watakaotumika kutoa huduma kwa wapiga kura ili kufanikisha zoezi hilo kwenda vizuri mpaka mwisho.

Makarani wa uchaguzi mdogo wa kata ya Vibaoni wakiendelea kupatiwa mafunzo na maafisa kutoka Tume ya Taifa ya uchaguzi(NEC) katika ukumbi wa Halmashauri ya Mji Handeni

Uchaguzi mdogo wa kata ya Vibaoni unaotarajiwa kufanyika jumamosi tarehe 17-12-2022 unakuja kufuatia aliyekuwa diwani wa kata hiyo Ndugu.Ramadhani Kuyugu (CCM) kujiuzulu nafasi hiyo mara baada ya kupata ajira ya kudumu serikalini na hivyo kiti cha udiwani kata ya vibaoni kuwa wazi.

Nae Afisa kutoka Tume ya Taifa  ya Uchaguzi Bi.Margareth Chambiri pamoja na mambo mengine, amewataka makarani hao kuwapa kipaumbele watu wenye makundi maalumu watakaojitokeza kupiga kura kwa kutokukaa kwenye foleni bali wawazingatie na kuhakikisha wanapiga kura haraka na kuendelea na shughuli zao nyingine, akitolea mfano wa makundi hayo maalum ameyataja kuwa ni mama wajawazito, wenye watoto wachanga, watu wenye ulemavu wa viungo, wazee nk

Mgeni rasmi katika mafunzo ya siku moja ya makarani waongozaji wapigaji kura Bi. Margareth Chambiri akifunga mafunzo hayo yaliyofanyika katika ukumbi wa Halmashauri ya Mji Handeni

Picha ya pamoja ya makarani waongozaji na Mgeni rasmi mara baada ya kuhitimisha mafunzo ya siku moja

Abdulkadir Kassim

Handeni Mji